10 წლის მარიამი, 4 წლის ლუკა და 3 წლის ნიკოლოზი ყოველდღე ელოდებიან დედიკოს და მამიკოს გამოჩენას. დილით რომ იღვიძებენ, ბებიას ყოველთვის ეკითხებიან  -  „ ბებო, დედა როდის მოვა?“. სამწუხაროდ, დღემდე არც დედა ჩანს და არც მამა...     

„ჩემმა ქალიშვილმა მიატოვა შვილები. ამბობენ, რომ გათხოვდა და ახალი ოჯახი შექმნა. არ ვიცი ახლა სად არის იგი...ღმერთო, მომეცი ძალა, რომ შიმშილით არ დამეხოცოს შვილიშვილები, რომ გავუძლო ამ დიდ ტკივილს და გადავარჩინო ბავშვები“, - ამბობს მარინე თულოშვილი, ბავშვების ბებია. 

ისინი გორის რაიონის სოფელ ვარიანში ცხოვრობენ, ყოფილი სახელმწიფო დაწესებულების ნახევრად გაპარტახებულ შენობაში,  სრულ სიღარიბესა და გაუსაძლის პირობებში. შიმშილი, სამწუხაროდ, მათი ცხოვრების თანამგზავრი გახდა, რამეთუ სოციალური შემწეობის გარდა, მარინე თულოშვილს სხვა შემოსავალი არ აქვს. იგი მზადაა იმუშაოს, მაგრამ სად? ამ ოჯახს არც მიწის ნაკვეთი გააჩნია და არც რაიმე ქონება, რომ გაყიდოს და თავი ცოტა ხნით მაინც ირჩინოს. 

ზამთარში შინ და გარეთ ერთი ტემპერატურაა, რის გამოც ბავშვები სულ ავადმყოფობენ, ახველებენ,  სიცხიანები და ნახევრად მშიერნი დადიან. სახლში აუტანელი პირობებია:  კედლები დანესტიანდა, ჭერი ლამის ჩამოინგრეს, ხოლო ოთახის შუაგულში იატაკი ჩაიზნიქა და დიდი ორმო გაჩნდა. 

„აი, ასე ვცხოვრობთ, თუ ამას ცხოვრება ჰქვია. რამდენჯერ დაუძინიათ ბავშვებს მშიერი...მეზობლები მეხმარებიან, მაგრამ მათ თავად ძალიან უჭირთ...მინდა, რომ მოვკვდე, მაგრამ ბავშვებს ვინ მოუვლის? ამიტომ ვცდილობ, რომ  არ მივეცე სასოწარკვეთას და გავაგრძელო ბრძოლა ბავშვების სიცოცხლის გადასარჩენად“,- ამბობს მარინე თულოშვილი.

მეგობრებო, შეუძლებელია, რომ ადამიანმა გულთან ახლოს არ მიიტანოს ამ პატარების გასაჭირი. დიახ, ბავშვებს მშობლები ჰყავთ, თუმცა ფაქტიურად ობლები გახდენენ. ახლა მათ ჩვენი თანადგომა და მხარდაჭერა სჭირდებათ. მოდით, ვანუგეშოთ ისინი და გავუწოდოთ დახმარების ხელი! 

თუ გაქვთ სურვილი, თანხა შეგიძიათ ჩარიცხოთ ჩვენი ფონდის ანგარიშზე GE15TB7194336080100003 ან GE64BG0000000470458000 (დანიშნულება: თულოშვილების ოჯახი) ან ჩარიცხოთ პირდაპირ ჩვენი საიტიდან    https://chernovetskyifund.ge/ge/projects/231-tugushi/. 

თქვენ, ასევე, შეგიძლიათ თანხის გადარიცხვა სწრაფი გადახდის ტერმინალებიდან NovaTechnology, TBCpay და ExpressPay. განყოფილებაში „ქველმოქმედება“ აირჩიეთ ჩვენი ფონდი (გადახდის წესები იხილეთ შემდეგ მისამართზე: https://goo. gl/GY2Gus).

„და შენი არს, უფალო, წყალობა, რადგან შენ მიუზღავ თითოეულს მისი ნამოქმედარის მიხედვით“.