დიახ, ეს 6 სულიანი ოჯახი  საშინელმა სიდუხჭირემ მოიცვა:  საცხოვრებელი, რომელიც ადრე ბოსელი იყო, ავარიულ მდგომარეობაშია; რკინის საწოლები  ისე ყანყალებენ, რომ სადაცაა დაიშლებიან; ტყუპებს ხელნაკეთ ყუთში სძინავთ; სახლში არც წყალია, არც გაზი და არც ტუალეტი. 

სოფელში, სადაც ეს ოჯახი ცხოვრობს, არ არის სკოლა, საბავშვო ბაღი, პროდუქტების მაღაზია, სამედიცინო პუნქტი...

ნუთუ ჩვენს ქვეყანაში ჯერ კიდევ არსებობენ ასეთი საცხოვრებელი ადგილები? სამწუხაროდ, დიახ! საგარეჯოდან 26 კილომეტრში მდებარეობს სოფელი სათაფლე, რომლის მოსახლეობა დაახლოებით 50 ადამიანს შეადგენს. აქ გამეფებულია შიმშილი და სიღარიბე, უიმედობა და  სასოწარკვეთა. ხალხმა არც კი იცის თუ როგორ უნდა გამოვიდეს ამ მძიმე მდგომარეობიდან და სასწრაფო შველას ითხოვს. ჩვენ ვესაუბრეთ ქსენიას, 4 შვილის დედას, და ვთხოვეთ მოეყოლა იმის შესახებ, თუ რატომ გადაწყვიტა ოჯახის შექმნა ამ მიყრუებულ სოფელში და როგორ აპირებს  გადარჩენას, ამ სიტყვის სრული მნიშვნელობით: 

- ქსენია, როგორ მოხვდით ამ სოფელში?

–  ეს იყო 10 წლის წინ. საგარეჯოში, სადაც ოჯახთან ერთად ვცხოვრობდი, ჩამოვიდა ახალგაზრდა ყმაწვილი და... შეგვიყვარდა ერთმანეთი. მაშინ დაახლოებით 20 წლისანი ვიყავით. ხომ გსმენიათ, სიყვარული ბრმა არისო, ხოდა ერთმანეთის გარდა არაფერზე ვფიქრობდით და არც დავფიქრებულვარ ისე გავყევი ჩემს შეყვარებულს ამ სოფელში.  გარდა ამისა, ძალიან ამიჩუყდა გული, როდესაც გავიგე რომ იგორი ობოლი იყო, არ ყავდა არც ნათესავები და არც მეგობრები. თქვენ წარმოიდგინეთ, მას პირადობის მოწმობაც კი არ აღმოაჩნდა. 

- რას საქმიანობს იგი? 

– მწყემსია და აქვს სეზონური სამუშაო. შემოსავალი იმდენად მწირია, რომ  ელემენტარულ საკვებზე არ გვყოფნის. ხშირად ფულის ნაცვლად საჭმელს აძლევენ და ამით ისტუმრებენ მას. ვცხოვრობთ ამ გაუბედურებულ შენობაში, რომელიც ადრე ბოსელი იყო. 

- უფროსი ქალიშვილები სად არინ?   

– სნეჟანა რვა წლის არის, ხოლო ვიქტორია ხუთის. ისინი დედაჩემთან ცხოვრობენ საგარეჯოში. დედას ბავშვები ჩვენთან შაბათ- კვირას ჩამოჰყავს. აბა რა ვქნა? საჭმელი ჩვენ არ გვაქვს და საცხოვრებელი პირობები, სკოლა და საბავშვო ბაღი?! 

-დედის გარდა ვინმე გეხმარებათ? 

-არავისთვის მიმიმართავს დახმარებისთვის, ისე მგონია, რომ ყველა უარს მეტყვის...

- ნუთუ არ გიფიქრიათ იმაზე, რომ როგორც მშობლები, პირველ რიგში სწორედ თქვენ აგებთ პასუხის შვილების კეთილდღეობაზე და ასეთმა პასიურობამ ხომ შეიძლება რომ გამოიწვიოს სავალალო შედეგი ბავშვებისთვის? 

– ბოდიში, რომ ვერ ვიკავებ ცრემლებს... ეს ჩვენთვის სერიოზული გაკვეთილია! დიდი მადლობა ჩერნოვეცკის ფონდს, რომ მოგვძებნეთ, ჩამოხვედით ამ სოფელში და მზად ხართ დახმარებისთვის. 

-ასეთ პირობებში როგორ უმკლავდებით ტყუპების მოვლას?

– ძალიან რთულია. დავაძინებ ტყუპებს და წყლის მოსატანად გავიქცევი, ოთახს დავალაგებ, წყალწყალა სუპს გავაკეთებ. ტყუპები ერთდროულად იღვიძებენ და მერე უკვე სხვას ვერაფერს ვაკეთებ. ხანდახან ისე ტირიან, რომ ვერ ვაჩერებ, ალბათ  რაღაცა აწუხებთ, მაგრამ სადაა წამლის ფული?

- სახლი, ავეჯი, ჭურჭელი.... გასაგებია, რომ ეს არის თქვენი მატერიალური სახის ოცნება, მაგრამ ხომ ვერ გაგვიმხელთ - თქვენი სული რაზე ოცნებობს? 

– მიუხედავად ასეთი მოუწყობელი ცხოვრებისა, ჩემი და იგორის სიყვარულმა გაუძლო დროს, უძლებს სიძნელეებს და ვოცნებობ, რომ  სიყვარულში გავატაროთ ჩვენი ცხოვრება. სწორედ სიყვარულმა გაგვაძლებინა აქამდე. ღამით, როდესაც ტყუპებს სძინავთ და ქმარი მთებში ნახირს უვლის, შიშის გრძნობა შემიპყრობს, დავანთებ სანთელს და ვლოცულობ: „უფალო, იესო ქრისტეო, შეგვიწყალენ ჩვენ ცოდვილნი" ... 

   მეგობრებო, ამ ოჯახის ისტორია, როგორც ხედავთ, ძალიან ჩახლართულია. პრობლემა ის კი არ არის, რომ ვიღაცას შეგნებულად არ უნდა თავი დააღწიოს სიდუხჭირეს, არამედ ის, რომ ამ ადამიანებს არ შესწევთ უნარი საკუთარი ძალებით მოაგვარონ თავიანთი პრობლემები. სწორედ ამიტომ სჭირდებათ მათ დახმარება და  თანადგომა, რამეთუ პირველ რიგში, როგორც ეს ხდება ამგვარ სიტუაციებში, სწორედ ბავშვები  იჩაგრებიან! 

ეს ოჯახი საჭიროებს საკვებ პროდუქტებს, მედიკამენტებს, თეთრეულს, ჭურჭელს, ავეჯს, ჰიგიენურ საშუალებებს. 

დახმარების თანხა შეგიძლიათ გადარიცხოთ ჩვენი ფონდის ანგარიშზე: GE15TB7194336080100003 ან  GE64BG0000000470458000 (დანიშნულება: პოლინასა და ელენესთვის). თანხის ჩარიცხვა შესაძლებელია ფონდის საიტიდანაც.   

თქვენ, ასევე, შეგიძლიათ თანხის გადარიცხვა სწრაფი გადახდის ტერმინალებიდან NovaTechnology, TBCpay და ExpressPay. განყოფილებაში „ქველმოქმედება“ აირჩიეთ ჩვენი ფონდი (გადახდის წესები იხილეთ შემდეგ მისამართზე: https://goo.gl/GY2Gus). 

კეთილ ადამიანს ქველმოქმედება სიხარულს ანიჭებს!

„ყველა კაცმა რომ იგი სიკეთე ჰქმნას, რის შემძლებიც არის, ქვეყნიერებაზე უბედურნი აღარ იქნებიან“ (ილია ჭავჭავაძე).