ჩითინაშვილების მრავალშვილიანი ოჯახი, რომელიც სიღნაღის მუნიციპალიტეტის სოფელ საქობოში სახლობს, უკიდურეს სიღარიბეში ცხოვრობს.  ოჯახის მამა ვერადავერ შოულობს სამსახურს, დედა კი - უკვე ლამისაა სასოწარკვეთას მიეცეს, რამეთუ მისი შვილების ნორმალურ განვითარებას დიდი საფრთხე ემუქრება. 

ჩვენ ვესაუბრეთ თამთა ჩითინაშვილს და ვთხოვეთ გაეზიარებინა მისი ოჯახის პრობლემები: 

-თამთა, რა წარმოადგენს სადღეისოდ თქვენი ოჯახის მთავარ პრობლემას?

თამთა: მეუღლემ ვერ იშოვა სამსახური. მზად არის იმუშაოს მშენებლობაზე ან ნებისმიერ სხვა ადგილას. სადაც არ იყო, ყველგან უარით გამოისტუმრეს. შესაბამისად სოციალური შემწეობის გარდა, არა გვაქვს არანაირი შემოსავალი და გვიჭირს. ღარიბულად ვცხოვრობთ, არა გვაქვს ნორმალური საკვები, ტანსაცმელი, ვერ ვარემონტებთ სახლს...

-როგორია თქვენი შვილების ყოველდღიური კვების რაციონი?

თამთა: ლობიო, მწვანილი, პური, წყალწყალა სუპი...2015 წელს მოგვიხსნეს სოციალური შემწეობა. მხოლოდ ნახევარი წლის შემდეგ მოხდა დახმარების აღდგენა. ძალიან გაგვიჭირდა ეს 6 თვე. მადლობა ღმერთს, ჯერ-ჯერობით ვუძლებთ, თუმცა რა იქნება ხვალ, არ ვიცი....

 -სახლი, სადაც თქვენ ცხოვრობთ, თქვენი საკუთრებაა?

თამთა: ეს ჩემი მეუღლის მშობლების სახლია. დანგრევამდეა უკვე მისული. ოთახები საკმაოდ დიდია, მაგრამ ზამთარში ვერ ვათბიობთ და ზაფხულში კედლები ნესტით იფარება. ავეჯი ძალიან ძველია და პრაქტიკულად გამოუსადეგარი.   

-ვინმეს მიმართეთ დახმარებისტვის?

თამთა: აბა ვის უნდა მივმართო? მთელ სოფელს უჭირს... დიდი მადლობა ჩერნოვეცკის ფონდს, რომ მოგვაქციეთ ყურადღება და დახმარება აღგვითქვით. 

-მორწმუნე ადამიანი ბრძანდებით?

თამთა: დიახ. ადგილობრივი ეკლესიის მრევლი ვარ და შვილებს ეკლესიურად ვზრდი. სახლში ხშირად ვლოცულობ, დაწოლის წინ კი უფალს ვევედრები, რომ მომცეს ძალა შვილების გამოსაკვებად. 

-დღეს ზოგიერთები აკრიტიკებენ იმ მრავალშვილიან ოჯახებს, რომლებსაც მატერიალურად უჭირთ. თქვენ როგორ უყურებთ ამ მოსაზრებას?

თამთა: არ ვეთანხმები ამ მოსაზრებას და კრიტიკას არ ვღებულობ. ბაშვები - ეს არის სიცოცხლის მამოძრავებელი ძალა. როდესაც მეოთხე ბავშვზე ვიყავი ორსულად, მინდოდა „მოშორება“, მაგრამ მამაომ მითხრა -შეგიძლია, რომ მოკლა რომელიმე შენი შვილი? არა, არ შეგიძლია!  ამიტომ რახან ხარ ორსულად, მეოთხე შვილიც უნდა გააჩინოო...

-რა არის თქვენი ყველაზე დიდი ოცნებ?

თამთა: შვილების ბედნიერება. მინდა, რომ გადავლახოთ ეს მძიმე პერიოდი და ვევედრები უფალს მოგვცეს ამის ძალა! 

-ახლა ბავშვებს გავესაუბრები. ბავშვები, თქვენი ოცნებების შესახებ მიამბეთ

ნიკა (13 წლის) - მე ვოცნებობ ველოსიპედზე და წიგნებზე. , ძალიან მიყვარს გეოგრაფიის საგანი, მაგრამ ჯერ არ გადამიწყვეტია ვინ უნდა გამოვიდე...

დიმიტრი (9 წლის): მე პიანინოზე ვოცნებობ...

მარიამი (6 წლის): მე ვოცნებობ ლამაზ კაბაზე და სათამაშოებზე...

მეგობრებო, ჩითინაშვილების ოჯახს ჩვენი თანადგომა ესაჭიროება. მოდით, გულთან ახლოს მივიტანოთ მათი პრობლემები და გავუწოდოთ დახმარების ხელი! 

მისამართი: სიღნაღის რაიონი, სოფელი საქობო, ტელ.: 571047030. ჩვენი ანგარიშია: GE15TB7194336080100003 ან  GE64BG0000000470458000 (დანიშნულება: ჩითინაშვილების ოჯახი). თანხის გადარიცხვა შეგიძლიათ ჩვენი საიტიდანაც

თქვენ, ასევე, შეგიძლიათ თანხის გადარიცხვა სწრაფი გადახდის ტერმინალებიდან NovaTechnology, TBCpay და ExpressPay. განყოფილებაში „ქველმოქმედება“ აირჩიეთ ჩვენი ფონდი (ფონდის დამატებით უფლებებს და მოვალეობებს გაეცანით ბმულზე https://goo.gl/GY2Gus)